الشراء من الصين – الجزء الاول

مقدمة الشراء من الصين :

كتير مننا بيحتاج يعمل عملية شراء من الصين سواء هيستورد منتج لإستخدام شخصي او قطعة غيار لجهاز . او حتي منتج عشان يبيعها تاني و في المقال دا انا هتكلم عن الحاجات الى بنجيبها استخدام شخصي . و هشرح فيها بالتفصيل كل حاجة و في مقال تاني هعمله بعد كدا هيكون مخصص للشراء بغرض الاتجار . او بغرض اعادة البيع وهنا هنسميه استيراد الجمله بمعني اني بشتري الحاجة جملة وببيعها تجزئه او ابيعها جمله , المهم اني بستورد كارتون او بستورد طبليه او بستورد كونتينر ” حاويه ” في الحالة دي هنسميها استيراد , لكن لو بشتري قطعة ليا مثلا موبيل او اي جهاز مش  هنبقي محتاجين نقول بنستورد . الكلمة هتكون كبيرة جدا علي اننا هنستورد قطعه هنكتفي بإننا نقول اشترينا .

الإستيراد من الصين :

طيب انا لو عايز اشتري مثلا موبيل او لابتوب او عايز اجيب كارت شاشه مثلا لتجميعه انا جايبها لكمبيوتر بتاعي . او هشتري رسيفر او اي منتج الكتروني او غير الكتروني ممكن اشتري من الصين ملابس . وبخامات كويسة و باسعار رخيصه جدا خلونا نشوف هنشتري ازاي ولا هنعمل ايه .

في برامج خاصه بـ التجار بتوع الصين البرامج دي انت بتدخل تشوف عليها الحاجات الى انت عايز تشتريها من الصين . سواء لاستخدام شخصي او هتستورد لإعادة البيع وهنتكلم عنها دلوقتي .

مواقع الشراء من الصين : 

في تطبيقين او موقعين اساسيين هما الاساس في الصين وهما ” علي بابا ” و ” علي إكسبريس ” . هنتكلم دلوقتي وهنشرح ازاي استخدم موقع علي بابا وازاي اشتري من علي بابا من الصين . و هنتكلم بردو عن موقع علي ا كسبريس وازاي اشتري منه و ازاي اطلب منه واشتري من الصين.

اولا علي بابا دا خاص بـ تجار جمله فهنخليه في مقال تاني هنعمله وهنوضح فيه . ازاي اشتري بضاعة من الصين عشان ابيعها في مصر واحقق ربح . دلوقتي هنتكلم عن علي اكسبريس وهو الخاص بالبيع للأفراد يعني انا كاني بشتري من سوق دوت كوم , او جوميا او اي تطبيق ايا كان وهنتكلم عن تجربتي الشخصيه.

علي اكسبريس واحد من اكتر المواقع في العالم مصداقيه , لأن الموقع بيديلك بعد ما الاوردر بيوصلك 30 يوم تقريبا لـ 40 يوم . بتقولهم فيه المنتج الى جاني دا مظبوط ولا لا وبتديلهم دليل ع المنتج الى جالك بالفيديو . او صور علي حسب حالة الاعتراض بتاعك وفي حالة ان المنتج بتاعك مش مظبوط . بيديلك اختيارات كتير زي انك ترجع المنتج وتاخد فلوسك . او لو المنتج جالك حاجة فيه ناقصه بيتيح ليك انك تاخد تعويض .

طيب انا ازاي استخدم علي اكسبريس عشان اشتري من الصين ؟

علي اكسبريس عبارة عن تطبيق بتحمله من المتجر بتاعك وبتشترك فيه زي اي تطبيق . زي سوق و جوميا بايميلك ورقم التليفون  وبنحط العنوان الى بيوصلك عليه الطلب بتاعك بالتفصيل .

بعد كدا ندخل نتفرج ع المنتجات الى عايزينها بتشوف المنتج الى انت عايزه . و هيكون سعره ظاهرلك باسعار رخيصه جدا وقبل ما تطلب . لازم تحدد وسيلة الشحن وهنا اللعبه والى لازم تركز فيها جدا .

اولا كل وسيلة شحن بيتحدد قدامها المدة والمدة دي قابله للزيادة , ممكن الزيادة دي توصل اسبوعين فوق الحد الاقصي يعني مثلا . لو المدة مكتوب 11 يوم ممكن توصل لـ 25 يوم لو المدة 40 يوم ممكن توصل 55 يوم .

تاني نقطة ودي الاهم انا اشتريت قطعة اكسسوار من الصين من علي اكسبريس بـ 60 دولار , و مكتوب انها شحن مجاني هل دا معناه اني هدفع 60 دولار بس ؟

الاجابه هنا هي لا , 60 دولار هيتدفعوا لـ علي اكسبريس لما اجي اشتري لكن بما اني اشتريت من الصين من بره مصر , لازم هدفع فلوس في الجمرك ولازم هدفع شحن داخلي جوه مصر غالبا بيكون للبريد . يعني ال 60 دولار دي رايحه لعلي اكسبريس للتاجر تحديدا , و تقريبا هيتدفع في متوسط 15 دولار للبريد و الجمارك ع الاقل بتدفعها وانت بتستلم . لكن لو حاجة زي ارامكس , التكلفة في الحالة دي بتاعت الشحن بتبقي اعلي وبتبقي شاملة التخليص و الشحن الداخلي , “بتبقي لحد باب بيتك” . بس بتحتاج تعملهم تفويض للتخليص وفي الحالة دي بتروح اقرب هاب ارامكس و الموظف هناك بيقولك تعمل التوكيل ازاي . 

طيب ايه الغلطات الى ناخد بالنا منها اثناء الشراء من علي اكسبريس من الصين ؟

حاجة مهمه جدا ان انت بتشتري كـ فرد يعني لو هتشتري قطعة او قطعتين تمام يعني لو بشتري سماعة مثلا للموبيل . ممكن اشتري واحده او اتنين لكن مينفعش اطلب مثلا 10 سماعات . هنا انت هتدفع و هتتشحنلك لكن لما توصل الجمارك في مصر هتبقي كارثه و احتمال انك تستلم البضاعة بتاعتك بنسبة 1% فقط . لأن هنا انت بتتاجر .. ولازم يكون معاك سجل تجاري و بطاقة ضريبية وبطاقة استيرادية و هتدفع جمارك اعلي بكتير . عشان كدا لازم ناخد بالنا إننا بنشتري كأفراد لازم لو هطلب حاجة يبقي عندي وعي .ان في موظف هيشوف الحاجة الى انا شاريها من الصين و الحاجة دي هتتفتح . وهيتاكد الى جواها مظبوط ولا لا ومطابق للفاتورة ولا لا يعني مينفعش تشتري حاجة من الصين ويتبعتلك حاجة تانية .

حاجات لازم تعرفها وانت بتشتري من الصين من علي اكسبريس  

هنفترض اني بشتري سماعة من الصين . السماعة بتتشحن وبتجيلك لحد المطار او المينا او اي جمرك في حالتها الطبيعيه . طب ايه المشكله ؟. المشكله ان السماعه لما بتوصلك بتبقي اتفتحت و ممكن تجيلك العلبه مقطوعة بس دا مش من التاجر في الصين لا دا من موظف الجمرك الى يستلمها . فعشان كدا احنا اتكلمنا في المقال دا عن الاستخدام الشخصي . بس لكن هنتكلم بعد كدا في طرق الاستيراد من الصين لغرض اعادة البيع , وازاي استلم الحاجة بحالتها وبجودتها من غير ما تتلمس في مقال تاني  .

زيارة موقع علي اكسبريس باللغة العربيه

طالع ايضا : طرق الربح من الفيس بوك وتفعيل النجوم